ចំនុចពិសេស

ភាពយន្តដែលយើងទន្ទឹងរង់ចាំទាំង 20 ក្នុងឆ្នាំ 2018

អ្នកសរសេរ: Casey Chong



ខ្សែភាពយន្តដែលពោរពេញទៅដោយការទន្ទឹងរង់ចាំមួយចំនួនដែលអ្នកគួររង់ចាំទស្សនាក្នុងឆ្នាំ 2018!

ឆ្នាំថ្មីស្រឡាង មានន័យថាការមកដល់នៃខ្សែភាពយន្តថ្មីៗជាច្រើនដែលរង់ចាំទស្សនិកជនទៅទស្សនានៅឯរោងកុននានា។ ជាមួយខ្សែភាពយន្តជាច្រើនរឿងក្នុងអំឡុងពេលចំនួន 12 ខែ ពួកយើងបានបង្រួមពួកវាសម្រាប់អ្នកហើយជ្រើសយកចំនួន 20 (ពួកយើងមិនអាចទប់ទល់ការបន្ថែមខ្សែភាពយន្តពីរទៀតទៅក្នុងបញ្ជីនេះ) នៃខ្សែភាពយន្តដែលពោរពេញទៅដោយការទន្ទឹងរង់ចាំបំផុតដែលអ្នកគួររង់ចាំទស្សនា។ ដូចនេះ ខ្សែភាពយន្តទាំងនេះរួមមាន:

1. "Black Panther"

Chadwick Boseman ត្រឡប់មកសម្តែងជា T'Challa ឬ Black Panther នៅក្នុងខ្សែភាពយន្ត Marvel ផ្ទាល់ខ្លួនដំបូងបំផុតរបស់គាត់ គឺ "Black Panther"។

តើវានិយាយពីអ្វី?: បន្ទាប់ពីមរណភាពនៃឪពុករបស់គាត់ក្នុង "Captain America: Civil War" (ឆ្នាំ 2016), T'Challa ឬ Black Panther (សម្តែងដោយ Chadwick Boseman) បានត្រឡប់ទៅស្រុកកំណើតរបស់គាត់វិញ ដើម្បីឡើងសោយរាជ្យជាស្តេចអង្គថ្មីនៃ Wakanda។ ប៉ុន្តែ គាត់បានជួបជាមួយការគម្រាមកំហែងថ្មីមួយដោយសត្រូវរបស់គាត់កំពុងព្យាយាមវាយលុកកំទេចអាណាចក្ររបស់គាត់។

តើវាមានអ្វីអស្ចារ្យ?: ការណែនាំបង្ហាញខ្លួនរបស់ Chadwick Boseman ជា Black Panther គឺជាចំណុចសំខាន់មួយក្នុង "Captain America: Civil War" កាលពីពីរឆ្នាំមុន។ ជាមួយក្រុមតារាសម្តែងដ៏អស្ចារ្យដែលរួមមាន Michael B. Jordan, Lupita Nyong'o, Daniel Kaluuya និង Forest Whitaker ខ្សែភាពយន្ត "Black Panther" មើលទៅមានភាពរឹងមាំល្អក្រោមការដឹកនាំរបស់ Ryan Coogler។ យ៉ាងណាមិញ គាត់បានបង្ហាញពីសមត្ថភាពដ៏ពូកែជាមួយការដឹកនាំខ្សែភាពយន្តបែបជីវប្រវត្តិដ៏ក្លាហាននៃ Oscar Grant III ក្នុង "Fruitvale Station" និងខ្សែភាពយន្តវគ្គថ្មីទៅនឹង "Rocky" គឺ "Creed" ដែលទទួលបានការកោតសរសើរយ៉ាងខ្លាំង។ វាពិតជាគួរឲ្យចាប់អារម្មណ៏ក្នុងការរង់ចាំមើលថាតើគាត់នឹងមានអ្វីអស្ចារ្យក្នុងស្នាដៃដឹកនាំខ្សែភាពយន្តដែលប្រើប្រាស់ដើមទុនផលិតដ៏ច្រើនដំបូងរបស់គាត់មួយនេះ។

2. "Annihilation"

Natalie Portman (ខាងឆ្វេង) ក្នុងឈុតមួយពី "Annihilation"។

តើវានិយាយពីអ្វី?: ពឹងផ្អែកទៅលើសៀវភៅឈ្នះពានរង្វាន់ដែលមានចំណងជើងដូចគ្នាដែលត្រូវបានសរសេរដោយ Jeff VanderMeer ខ្សែភាពយន្ត "Annihilation" និយាយពីជីវវិទូមួយរូបឈ្មោះ Lena (សម្តែងដោយ Natalie Portman) ដែលបានដឹកនាំបេសកកម្មដ៏ចម្លែកមួយដែលអ្វីៗខុសពីការស្មានទាំងអស់។

តើវាមានអ្វីអស្ចារ្យ?: ពីរពាក្យ: Alex Garland។ បួនឆ្នាំមុន គាត់បានបង្ហាញមុខជាមួយការដឹកនាំលើកដំបូងដ៏ប្លែកភ្នែកជាមួយ "Ex Machina" ដែលត្រូវបានគេស្គាល់ថាជាខ្សែភាពយន្តដែលបង្ហាញពីសមត្ថភាពសម្តែងដ៏អស្ចារ្យរបស់ Alicia Vikander។ ខ្សែភាពយន្តមួយនេះក៏បានបង្ហាញពីភាពឆ្លាតវៃរបស់ Garland ក្នុងការដឹកនាំខ្សែភាពយន្តបែប sci-fi ដែលអាចបំផុសគំនិតរបស់ទស្សនិកជនផងដែរ។ "Annihilation" នឹងឃើញ Garland ដើរតាមគន្លងដដែលហើយសម្រាប់អ្នកស្រឡាញ់ចូលចិត្តភាពយន្តបែប sci-fi ខ្សែភាពយន្តដែលនឹងចេញឆាប់ៗរបស់គាត់មួយនេះគឺពិតជាគួរឲ្យទន្ទឹងរង់ចាំទស្សនា។

3. "Red Sparrow"

Jennifer Lawrence សម្តែងជាចារនារីជនជាតិរុស្សី ឈ្មោះ Dominika Egorova នៅក្នុង "Red Sparrow"។

តើវានិយាយពីអ្វី?: ពឹងផ្អែកទៅលើសៀវភៅប្រលោមលោកសរសេរដោយ Jason Matthews ដែលមានចំណងជើងដូចគ្នា Jennifer Lawrence នឹងសម្តែងជា Dominika Egorova ជាអ្នករាំរបាំបាទ្បេជនជាតិរុស្សី ដែលត្រូវបានជ្រើសរើសដោយក្រុមហ៊ុនស៊ើបការណ៍សម្ងាត់របស់រុស្សីមួយដើម្បីក្លាយជាចារនារី។

តើវាមានអ្វីអស្ចារ្យ?: ខ្សែភាពយន្តនេះជាការជួបជុំគ្នារវាងអ្នកដឹកនាំរបស់ "The Hunger Games" គឺ Francis Lawrence និងតារារបស់វាគឺ Jennifer Lawrence។ តាមរយៈឃ្លីបខ្លីៗរបស់វា ខ្សែភាពយន្ត "Red Sparrow" នឹងអាចជាខ្សែភាពយន្ត "Atomic Blonde" ក្នុងឆ្នាំនេះ។

4. "Tomb Raider"

Alicia Vikander ជា Lara Croft ថ្មីក្នុងខ្សែភាពយន្តថតឡើងវិញនៃ "Tomb Raider"។

តើវានិយាយពីអ្វី?: ក្នុងខ្សែភាពយន្តថតឡើងវិញនៃវីដេអូហ្គេមដ៏ល្បីល្បាញមួយនេះ Lara Croft (សម្តែងដោយ Alicia Vikander) នឹងដឹកនាំបេសកកម្មដំបូងរបស់នាងជាបុរាណវត្ថុវិទូដែលបានក្លាយជាអ្នកផ្សងព្រេង ក្នុងការគាស់រកអាថ៌កំបាំងសម័យបុរាណមួយ។

តើវាមានអ្វីអស្ចារ្យ?: វាគួរដល់ពេលដែលយើងទទួលបានខ្សែភាពយន្ត "Tomb Raider" ថ្មីមួយហើយ បន្ទាប់ពីខ្សែភាពយន្តសម្តែងដោយ Angelina Jolie ទាំងពីររឿងកាលពីដើមឆ្នាំ 2000។ ខ្សែភាពយន្តវគ្គបន្តដែលពោរពេញទៅដោយការទន្ទឹងរង់ចាំមួយនេះពឹងផ្អែកទៅលើវីដេអូហ្គេមឆ្នាំ 2013 របស់ Crystal Dynamics ជាចំណុចចាប់ផ្តើម ហើយវាគឺជារបៀបដ៏ឆ្លាតមួយក្នុងការណែនាំតួអង្គ Lara Croft ដ៏ល្បីឈ្មោះរូបនេះទៅកាន់ទស្សនិកជនសម័យថ្មី។ កាលពីដំបូង Alicia Vikander ហាក់ដូចជាជម្រើសដែលមិនអាចទុកចិត្តបានមួយ ប៉ុន្តែបន្ទាប់ពីបានទស្សនាឃ្លីបខ្លីដំបូងរបស់ភាពយន្ត នាងប្រហែលជាបេក្ខជនដ៏ល្អបំផុតក្នុងការសម្តែងតួអង្គមួយនេះ។

5. "Pacific Rim: Uprising"

ដល់ពេល mecha time ម្តងទៀតហើយក្នុង "Pacific Rim: Uprising"។

តើវានិយាយពីអ្វី?: Jake Pentecost (សម្តែងដោយ John Boyega) ដែលជាកូនប្រុសរបស់ General Stacker Pentecost នឹងដឹកនាំក្រុមសម័យថ្មីនៃអ្នកបើកបរ Jaeger រួមជាមួយ Mako Mori (សម្តែងដោយ Rinko Kikuchi) និងសមាជិកក្រុមឯទៀតក្នុងការបញ្ឈប់ការគម្រាមកំហែងរបស់ Kaiju ថ្មីមួយ។

តើវាមានអ្វីអស្ចារ្យ?: ជាមួយ Guillermo del Toro លែងមានឈ្មោះជាអ្នកដឹកនាំសម្រាប់ខ្សែភាពយន្តវគ្គបន្តដែលទស្សនិកជនបានទន្ទឹងរង់ចាំយ៉ាងយូរមួយនេះ វាមើលទៅហាក់ដូចជាអស់សង្ឃឹមទៅហើយ។ យ៉ាងណាមិញ del Toro នៅតែបន្តដើរតួជាផលិតករ ហើយខ្សែភាពយន្ត "Pacific Rim: Uprising" នឹងបង្ហាញពីសមត្ថភាពរបស់ Steven S. DeKnight ដែលជាផលិតករទទួលបានការកោតសរសើរដោយបាននាំយកនូវរដូវកាលដំបូងនៃស៊េរីរឿងភាគ "Daredevil" របស់ Netflix រីឯ John Boyega ពី "Star Wars" នឹងសម្តែងតួអង្គឯក។

6. "Ready Player One"

Wade Watts (សម្តែងដោយ Tye Sheridan) បានចូលទៅក្នុងពិភព virtual-reality នៃ OASIS ក្នុង "Ready Player One"។

តើវានិយាយពីអ្វី?: ប្រព្រឹត្តទៅក្នុងពេលអនាគតក្នុងឆ្នាំ 2045 ខ្សែភាពយន្ត "Ready Player One" វិលជុំវិញ Wade Watts (សម្តែងដោយ Tye Sheridan) ជាក្មេងវ័យជំទង់មួយរូបដែលព្យាយាមគេចពីភាពកណ្តោចកណ្តែងដោយចូលទៅក្នុងពិភព virtual reality មួយហៅថា OASIS (តំណាងឲ្យ Ontologically Anthropocentric Sensory Immersive Simulation)។

តើវាមានអ្វីអស្ចារ្យ?: បន្ទាប់ពីចំណាយពេលជាច្រើនមួយរយៈចុងក្រោយនេះក្នុងការដឹកនាំខ្សែភាពយន្តបែបកិត្យានុភាពដូចជា "Lincoln" និង "Bridge Of Spies" ទីបំផុតវាដល់ពេលដែលយើងនឹងអាចឃើញ Steven Spielberg ត្រឡប់មកវិញហើយជាមួយខ្សែភាពយន្តហេ្គមខ្នាតធំមួយ។ សៀវភៅប្រលោមលោករបស់ Ernest Cline ផ្ទាល់គឺពិតជាអស្ចារ្យ ហើយប្រសិនបើអ្នកបានទស្សនាគ្លីបខ្លីរបស់ភាពយន្តកាលពីថ្មីៗនេះ វាពោរពេញទៅដោយការទាក់ទងទៅនឹងវប្បធម៌បច្ចុប្បន្នដូចជា "Tron", "Back To The Future", "Akira" និងផ្សេងៗទៀត!

7. "The New Mutants"

តារារបស់ "Game Of Thrones" គឺ Maisie Williams សម្តែងជា Rahne Sinclair/Wolfsbane ក្នុង "The New Mutants"។

តើវានិយាយពីអ្វី?: "The New Mutants" ផ្តោតទៅលើមនុស្សដែលមានសមត្ថភាពពិសេសវ័យក្មេងចំនួនប្រាំរូបដែលបានរកឃើញសមត្ថភាពថាមពលពិសេសរបស់ពួកគេពេលកំពុងជាប់ឃុំនៅទីតាំងសម្ងាត់មួយកន្លែង។

តើវាមានអ្វីអស្ចារ្យ?: វាជាខ្សែភាពយន្តថ្មីរបស់ "X-Men" ប៉ុន្តែវានឹងខុសពីអ្វីៗដែលអ្នកបានទស្សនាកាលពីមុន។ អាចនិយាយបានថា វាជាខ្សែភាពយន្តពឹងផ្អែកលើសៀវភៅត្លុកដែលត្រូវបានដឹកនាំក្នុងទម្រង់ខ្សែភាពយន្តចិត្តសាស្ត្របែបភ័យខ្លាច។ ប្រសិនបើធ្វើបានល្អ វានឹងអាចជាខ្សែភាពយន្តដ៏ជោគជ័យអស្ចារ្យមួយ។

8. "Rampage"

Dwayne Johnson សម្តែងជាអ្នកសិក្សាពីថនិកសត្វមួយរូបឈ្មោះ Davis Okoye ក្នុង "Rampage"។

តើវានិយាយពីអ្វី?: ពឹងផ្អែកទៅលើវីដេអូហ្គេមជំនាន់ '80s របស់ Midway Games ខ្សែភាពយន្ត "Rampage" ផ្តោតទៅលើ Davis Okoye (សម្តែងដោយ Dwayne Johnson) ជាអ្នកសិក្សាពីថនិកសត្វមួយរូប ដែលត្រូវស្វែងរកថ្នាំបន្សាបដើម្បីជួយសង្គ្រោះ George ដែលជាស្វាផឿកប្រភេទ silverback gorilla ដែលបានប្រែប្រួលពីស្លូតបូតទៅជាកាចសាហាវ។

តើវាមានអ្វីអស្ចារ្យ?: Dwayne Johnson + gorilla យក្សបង្កើតដោយ CGI និងការប្រយុទ្ធដ៏ធំធេងរវាងសត្វចចកដែលត្រូវបានប្តូររូបរាងនិងសត្វក្រពើ។ Brad Peyton មិនមែនជាជនប្លែកមុខឡើយក្នុងការដឹកនាំខ្សែភាពយន្តខ្នាតធំពីការបំផ្លិចបំផ្លាញដ៏ធំធេងមួយ ជាពិសេសជាមួយបទពិសោធន៏របស់គាត់ក្នុងខ្សែភាពយន្តឆ្នាំ 2015 គឺ "San Andreas"។ វានឹងជាខ្សែភាពយន្តរដូវក្តៅដ៏សប្បាយរីករាយមួយដែលនឹងទស្សនាល្អបំផុតនៅលើកញ្ចក់អេក្រង់ធំ។

9. "Avengers: Infinity War"

សង្គ្រាមនឹងចាប់ផ្តើមនៅក្នុង "Avengers: Infinity War"។

តើវានិយាយពីអ្វី?: វីរបុរសដ៏អស្ចារ្យបំផុតទាំងអស់នៅលើភពផែនដី និងសម្ព័ន្ធមិត្តរបស់ពួកគេ ត្រូវចាប់ដៃគ្នាដើម្បីបញ្ឈប់សត្រូវដ៏ខ្លាំងក្លាឈ្មោះ Thanos (សម្តែងដោយ Josh Brolin)។

តើវាមានអ្វីអស្ចារ្យ?: យើងអាចធានាបានយ៉ាងងាយថា វាជាខ្សែភាពយន្តដែលពោរពេញទៅដោយការទន្ទឹងរង់ចាំជាងគេបំផុតក្នុងឆ្នាំនេះ! បន្ទាប់ពីរយៈពេល 10 ឆ្នាំនៃការភ្ជាប់ទំនាក់ទំនងគ្នារវាងខ្សែភាពយន្ត MCU ទាំងឡាយតាំងពីខ្សែភាពយន្ត "Iron Man" ក្នុងឆ្នាំ 2008 មក យើងអាចនិយាយបានថាភាពមហន្តរាយដ៏ធំជាងគេបង្អស់នឹងមកដល់ក្នុង "Avengers: Infinity War"។ មែនហើយ វានឹងជាខ្សែភាពយន្តហូលីវូដខ្នាតធំដែលធំនិងអស្ចារ្យជាងគេបង្អស់លើសពីខ្សែភាពយន្តវីរបុរសណាៗទាំងអស់។

10. "Solo: A Star Wars Story"

ក្រុមតារាសម្តែងនៃ "Solo: A Star Wars Story" រួមមាន Alden Ehrenreich (កណ្តាល) សម្តែងជា Han Solo វ័យក្មេង។

តើវានិយាយពីអ្វី?: ខ្សែភាពយន្ត "Star Wars" ថ្មីជាងគេបង្អស់មួយនេះប្រព្រឹត្តទៅក្នុងអំឡុងការផ្សងព្រេងកាលពីវ័យក្មេងរបស់ Han Solo (សម្តែងដោយ Alden Ehrenreich) និង Chewbacca (សម្តែងដោយ Joonas Suotamo) មុនពេលចូលរួមពួក Rebellion។

តើវាមានអ្វីអស្ចារ្យ?: វាជាខ្សែភាពយន្ត "Star Wars" ថ្មីមួយ ហើយត្រឹមតែកេរ្តិ៏ឈ្មោះរបស់វាក៏គ្រប់គ្រាន់ក្នុងការបំពេញកៅអីក្នុងរោងកុនដែរ។ ប៉ុន្តែការដែលខ្សែភាពយន្តថ្មីទីពីររបស់ "Star Wars" មួយនេះនឹងអាចដើរតាមគន្លងរបស់ខ្សែភាពយន្ត "Rogue One: A Star Wars Story" ដែលទទួលបានប្រតិកម្មយ៉ាងល្អនោះឬអត់ គឺនៅមិនទាន់អាចថាបាននៅឡើយ។ យ៉ាងណាមិញតួអង្គ Han Solo នឹងនៅតែសាកសមបំផុតជាមួយ Harrison Ford ហើយនិយាយឲ្យត្រង់ទៅ Alden Ehrenreich នឹងត្រូវព្យាយាមខ្លាំងក្នុងការបញ្ចុះបញ្ចូលឲ្យអ្នកគាំទ្រទាំងថ្មីនិងទាំងចាស់អាចទុកចិត្តបានថាគាត់អាចសម្តែងតួអង្គវ័យក្មេងរបស់ Han Solo បាន។ ខ្សែភាពយន្តមួយនេះទទួលរងនូវវិបត្តិមួយចំនួនក្នុងដំណាក់កាលផលិត ជាពិសេសការបណ្តេញដ៏ចម្រូងចម្រាសនៃអ្នកដឹកនាំដើម Phil Lord និង Chris Miller ដែលទទួលបានកេរ្តិ៏ឈ្មោះពីខ្សែភាពយន្ត "The Lego Movie" ប៉ុន្តែ Ron Howard មើលទៅដូចជាអ្នកជំនួសដែលអាចទុកចិត្តបាន ដោយគាត់ធ្លាប់មានបទពិសោធន៏ដឹកនាំខ្សែភាពយន្តហូលីវូដខ្នាតធំជាច្រើនរឿង។

11. "Deadpool 2"

The Merc with the Mouth ត្រឡប់មកវិញជាមួយភាពឡេះឡោះក្នុង "Deadpool 2"។

តើវានិយាយពីអ្វី?: The Merc with the Mouth (សម្តែងដោយ Ryan Reynolds) នឹងត្រឡប់មកវិញជាមួយខ្សែភាពយន្តវគ្គបន្តដែលពោរពេញទៅដោយការទន្ទឹងរង់ចាំ រួមជាមួយតួអង្គថ្មីគឺ Domino (សម្តែងដោយ Zazie Beetz) និង Cable (សម្តែងដោយ Josh Brolin)។

តើវាមានអ្វីអស្ចារ្យ?: ភាពជោគជ័យនៃខ្សែភាពយន្ត "Deadpool" ដំបូងក្នុងឆ្នាំ 2016 បានបង្ហាញឲ្យឃើញថាវាមានទីផ្សារដ៏ធំសម្រាប់ខ្សែភាពយន្តវីរបុរសបែប R-rated (អាយុ 18 ឆ្នាំឡើង)។ ប្រសិនបើពួកគេអាចរក្សាអារម្មណ៏ដដែលនៅក្នុងខ្សែភាពយន្តវគ្គបន្តមួយនេះ វានឹងអាចជាបទពិសោធន៏ទស្សនាភាពយន្តក្នុងរោងកុនដ៏អស្ចារ្យមួយទៀតហើយ!

12. "Jurassic World: Fallen Kingdom"

ពួកសត្វ T-Rex គ្រប់គ្រងម្តងទៀតក្នុង "Jurassic World: Fallen Kingdom"។

តើវានិយាយពីអ្វី?: លើកនេះ Owen (សម្តែងដោយ Chris Pratt) និង Claire (សម្តែងដោយ Bryce Dallas Howard) នឹងប្រណាំងប្រជែងជាមួយពេលវេលាដើម្បីជួយសង្គ្រោះពួកសត្វដាយណូស័រក្នុងអំឡុងបន្ទុះភ្នំភ្លើងមួយ។

តើវាមានអ្វីអស្ចារ្យ?: តើមាននរណាទៅដែលគិតថា "Jurassic World" ចេញក្នុងឆ្នាំ 2015 អាចក្លាយជាខ្សែភាពយន្តដែលរកចំណូលបានច្រើនសន្ធឹកសន្ធាប់ដូចនេះ ជាមួយចំណូលសរុបទូទាំងពិភពលោកជាង 1.6 ពាន់លានដុល្លារ? វាបង្ហាញឲ្យឃើញយ៉ាងច្បាស់ថាទស្សនិកជនសម័យបច្ចុប្បន្ននៅតែចាប់អារម្មណ៏ទស្សនាពួកសត្វដាយណូស័របង្កើតភាពចលាចលនៅលើកញ្ចក់អេក្រង់ធំ ទោះបីជានៅក្នុងសម័យដែលពោរពេញទៅដោយវីរបុរសមួយនេះ។ គោរពតាមប្រពៃណីនៃវគ្គបន្តរបស់ខ្សែភាពយន្តខ្នាតធំទូទៅ អ្នកអាចទន្ទឹងចាំទស្សនាសត្វដាយណូស័រនិងសកម្មភាពកាន់តែច្រើនជាងមុខទៀតដែលនឹងទស្សនាល្អបំផុតនៅលើកញ្ចក់អេក្រង់ធំ។

13. "Ocean's 8"

ក្រុមសមាជិកស្រីទាំងអស់ដឹកនាំដោយ Debbie Ocean (សម្តែងដោយ Sandra Bullock) ដែលត្រៀមរួចរាល់សម្រាប់ការលួចប្លន់ដ៏ធំមួយក្នុង "Ocean's 8"។

តើវានិយាយពីអ្វី?: ក្នុងខ្សែភាពយន្តថ្មីរបស់ "Ocean's Eleven" ដែលប្រជុំទៅដោយតារាស្រីនោះ ប្អូនស្រីរបស់ Danny Ocean ឈ្មោះ Debbie (សម្តែងដោយ Sandra Bullock) គ្រោងធ្វើការលួចប្លន់ដ៏ធំមួយនៅឯកម្មវិធីអបអរសាទរប្រចាំឆ្នាំ Met Gala នៅឯទីក្រុង New York City ដែលចូលរួមដោយតារាល្បីឈ្មោះជាច្រើនរូប ជាមួយក្រុមការងាររបស់នាង (Cate Blanchett, Helena Bonham Carter, Rihanna, Mindy Kaling, Sarah Paulson និង Awkwafina)។ Anne Hathaway ក៏ចូលរួមសម្តែងផងដែរ។

តើវាមានអ្វីអស្ចារ្យ?: ការផ្លាស់ប្តូរភេទតួអង្គរបស់តារាសម្តែងនៅក្នុងខ្សែភាពយន្តគឺជាទំនោរដ៏ពេញនិយមមួយសព្វថ្ងៃនេះ (ឧទាហរណ៏ ខ្សែភាពយន្តផលិតឡើងវិញរបស់ "Ghostbusters")។ ដូចនេះ វាគ្មានអ្វីគួរឲ្យភ្ញាក់ផ្អើលឡើយនៅពេលដែលស៊េរីរឿងដើរតួដោយបុរសទាំងអស់នៃ "Ocean's Eleven" ទទួលបានការប្តូរទៅជាតារាស្រីទាំងអស់ក្នុង "Ocean's 8"។ ក្រុមតារាសម្តែងដែលប្រជុំទៅដោយតារាល្បីៗគឺគ្រប់គ្រាន់ទៅហើយក្នុងការទាក់ទាញទស្សនិកជនសម័យបច្ចុប្បន្ន។ ឥឡូវនេះ យើងអាចរង់ចាំមើលថាតើអ្នកដឹកនាំរបស់ "Pleasantville" និង "The Hunger Games" លោក Gary Ross នឹងអាចរៀបចំខ្សែភាពយន្តបែបលួចប្លន់ដ៏អស្ចារ្យដូចដែល Steven Soderbergh បានធ្វើជាមួយខ្សែភាពយន្តទាំងបីមុនឬយ៉ាងណា?

14. "Incredibles 2"

Mr. Incredible (បញ្ចូលសម្លេងដោយ Craig T. Nelson) និងកូនប្រុសរបស់គាត់ Jack-Jack ក្នុង "Incredibles 2"។

តើវានិយាយពីអ្វី?: ក្នុងខ្សែភាពយន្តវគ្គបន្តមួយនេះ Bob Parr ឬ Mr. Incredible (បញ្ចូលសម្លេងដោយ Craig T. Nelson) កំពុងនៅផ្ទះមើលថែរក្សាកូនៗរបស់គាត់ ហើយបានរកឃើញថាកូនង៉ែត Jack-Jack មានថាមពលពិសេសដ៏អាថ៌កំបាំង។

តើវាមានអ្វីអស្ចារ្យ?: កាលពីដប់បួនឆ្នាំមុន ខ្សែភាពយន្ត "The Incredibles" បានបង្ហាញខ្លួនលើកដំបូងយ៉ាងអស្ចារ្យជាមួយការកោតសរសើរយ៉ាងខ្លាំង។ វាក៏ជាខ្សែភាពយន្តវីរបុរសដ៏អស្ចារ្យមួយដែលមិនមែនជាខ្សែភាពយន្តដើរតួដោយមនុស្សផងដេរ។ លើសពីនេះទៅទៀត Brad Bird នឹងត្រឡប់មកអង្គុយលើកៅអីអ្នកដឹកនាំ ហើយយើងអាចសន្មតបានថាខ្សែភាពយន្តវគ្គបន្តមួយនេះនៅក្នុងដៃរបស់អ្នកដឹកនាំដែលយើងអាចជឿទុកចិត្តបាន។

15. "Ant-Man And The Wasp"

Paul Rudd និង Evangeline Lilly នៅទីតាំងថតនៃ "Ant-Man And The Wasp"។

តើវានិយាយពីអ្វី?: បន្ទាប់ពីព្រឹត្តិការណ៏នៃ "Captain America: Civil War" មិនយូរប៉ុន្មាន Scott Lang ឬ Ant-Man (សម្តែង Paul Rudd) បានចាប់ដៃជាមួយ Hope van Dyne ឬ Wasp (សម្តែងដោយ Evangeline Lilly) ក្នុងបេសកកម្មថ្មីមួយ។

តើវាមានអ្វីអស្ចារ្យ?: ត្រូវបានឲ្យនាមជាខ្សែភាពយន្តបែបស្នេហាលាយកំប្លែងដំបូងរបស់ Marvel វានឹងជាការផ្លាស់ប្តូរបរិយាកាសដ៏ប្លែកពីខ្សែភាពយន្តធម្មតារបស់ MCU។ Peyton Reed ដែលបានដឹកនាំខ្សែភាពយន្ត "Ant-Man" ដំបូង នឹងត្រឡប់មកវិញជាលើកទីពីរនៅក្នុងខ្សែភាពយន្តវគ្គបន្តមួយនេះ។

16. "The Nun"

ដូនជីបិសាច Valak (សម្តែងដោយ Bonnie Aarons) នឹងត្រឡប់មកលងរោងកុននៅក្នុង "The Nun"។

តើវានិយាយពីអ្វី?: ប្រព្រឹត្តិទៅក្នុងឆ្នាំ 1952 នៅប្រទេសរ៉ូម៉ានី ខ្សែភាពយន្តថ្មីពីស៊េរីរឿង "Conjuring" មួយនេះ នឹងផ្តោតទៅលើការស៊ើបអង្កេតពីការស្លាប់របស់ដូនជីមួយនេះ។

តើវាមានអ្វីអស្ចារ្យ?: ឈុតដ៏គួរខ្លាចបំផុតមួយនៅក្នុងខ្សែភាពយន្ត "The Conjuring 2" ក្នុងឆ្នាំ 2016 គឺពិតជាវត្តមានដ៏ព្រឺព្រួចរបស់ដូនជីបិសាចឈ្មោះ Valak សម្តែងដោយ Bonnie Aarons។ ប្រសិនបើអ្នកដឹកនាំរបស់ "The Hallow" គឺ Corin Hardy អាចរក្សាបាននូវអារម្មណ៍ភ័យខ្លាចដូចដែល James Wan បានណែនាំនាងក្នុងភាពយន្តដំបូង វានឹងជាខ្សែភាពយន្តភ័យខ្លាចដែលអ្នកគួររង់ចាំទស្សនា។

17. "Alita: Battle Angel"

Rosa Salazar និងកែវភ្នែក "anime" របស់នាងនៅក្នុង "Alita: Battle Angel"។

តើវានិយាយពីអ្វី?: "Alita: Battle Angel" និយាយពីសាច់រឿងរបស់តួអង្គមួយរូប (សម្តែងដោយ Rosa Salazar) ដែលជាមនុស្សយន្ត cyborg ជាមួយប្រវត្តិដ៏អាថ៌កំបាំង។

តើវាមានអ្វីអស្ចារ្យ?: ខ្សែភាពយន្តដែលពោរពេញទៅដោយការទន្ទឹងរង់ចាំគឺ "Alita: Battle Angel" បានស្ថិតក្នុងដំណាក់អភិវឌ្ឍតាំងពី James Cameron បង្ហាញការចាប់អារម្មណ៏ទៅលើការដឹកនាំខ្សែភាពយន្តពឹងផ្អែកលើសៀវភៅត្លុកបែប cyberpunk របស់ Yukito Kushiro កាលពីឆ្នាំ 2000 មកម៉្លេះ។ មែនហើយ "Avatar" បានកើតឡើង ហើយគម្រោងមួយនេះត្រូវបានផ្ទេរទៅឲ្យ Robert Rodriguez ដែលបាននិយាយថាគាត់ជាអ្នកគាំទ្រស្លាប់រស់របស់សៀវភៅត្លុកមួយនេះផ្ទាល់។ និយាយតាមត្រង់ទៅ ពួកយើងពិតជាចង់ឃើញ Cameron នៅក្នុងកៅអីអ្នកដឹកនាំជាង។ យ៉ាងណាមិញ ជាមួយ Cameron នៅតែមានឈ្មោះជាអ្នកសរសេរសាច់រឿងនិងអ្នកផលិត វាពិតជាពិបាកក្នុងការមិនខ្វល់ខ្វាយពីខ្សែភាពយន្តផ្សងព្រេងបែប sci-fi ដែលនឹងចេញឆាប់ៗនេះ។ ឥឡូវនេះ ប្រសិនបើយើងអាចទទួលយកបាននូវកែវភ្នែក "anime" ដ៏ព្រឺព្រួចរបស់ Rosa Salazar ដែលបានឃើញនៅក្នុងគ្លីបខ្លីដំបូងរបស់ខ្សែភាពយន្ត...

18. "Mission: Impossible 6"

Tom Cruise សម្តែងជាតួអង្គ Ethan Hunt របស់គាត់ម្តងទៀត នៅទីតាំងថតនៃ "Mission: Impossible 6"។

តើវានិយាយពីអ្វី?: យើងមិនសូវដឹងពីពត៌មានទាក់ទង់នឹងខ្សែភាពយន្ត "Mission: Impossible" ទីប្រាំមួយឡើយ ប៉ុន្តែវាប្រាកដជាការផ្សងព្រេងបែបចារកម្មម្តងទៀតជាមួយ Tom Cruise, Rebecca Ferguson និង Simon Pegg សម្តែងជាតួអង្គរបស់ពួកគេម្តងទៀតជា Ethan Hunt, Ilsa Faust និង Benji Dunn។

តើវាមានអ្វីអស្ចារ្យ?: អរគុណដល់ការដឹកនាំដ៏ក្បោះក្បាយរបស់ McQuarrie នៅក្នុង "Mission: Impossible - Rogue Nation" វាពិតជាអាចចាត់ទុកបានថាជាខ្សែភាពយន្តល្អបំផុតនៅក្នុងស៊េរីរឿងមួយនេះ។ ជាមួយ McQuarrie ត្រឡប់មកអង្គុយក្នុងកៅអីអ្នកដឹកនាំវិញ យើងអាចទន្ទឹងរង់ចាំទស្សនាភាពអស្ចារ្យនិងក្បាច់បច្ចេកទេសដ៏សាហាវដោយ Tom Cruise។

19. "The Predator"

ក្រុមតារាសម្តែងនៃ "The Predator"។

តើវានិយាយពីអ្វី?: ខ្សែភាពយន្ត "Predator" ដែលនឹងចេញឆាប់ៗនេះ នឹងជាសាច់រឿងថ្មីមួយហើយក៏ជាវគ្គបន្តផងដែរទៅនឹងខ្សែភាពយន្តឆ្នាំ 1987 គឺ "Predator" និងខ្សែភាពយន្តឆ្នាំ 1990 គឺ "Predator 2"។

តើវាមានអ្វីអស្ចារ្យ?: ពួកបិសាច Predator គឺជាតួអង្គក្នុងរឿងដ៏ល្បីល្បាញមួយ ប៉ុន្តែស៊េរីខ្សែភាពយន្តរបស់វាមិនមានជោគវាសនាដូចគ្នាឡើយ។ Shane Black តារាសម្តែងដែលដើរតួជា Hawkins ក្នុងខ្សែភាពយន្ត "Predator" ដំបូង ទទួលបានការងារដឹកនាំខ្សែភាពយន្តថ្មីមួយនេះ។ Black គឺជាអ្នកដឹកនាំដ៏ល្បីឈ្មោះមួយរូបដែលរកទ្រព្យសម្បត្តិរបស់គាត់តាមរយៈការសរសេរសាច់រឿងរបស់ខ្សែភាពយន្ត "Lethal Weapon" ដំបូង និងដឹកនាំខ្សែភាពយន្ត "Iron Man 3" ដែលរកចំណូលបានច្រើនសន្ធឹកសន្ធាប់។ លើសពីនេះទៅទៀត ខ្សែភាពយន្តមួយនេះនឹងជាវគ្គបន្តទៅនឹងខ្សែភាពយន្ត "Predator" និង "Predator 2" ដែលអ្នកគាំទ្រជាច្រើននាក់បានរង់ចាំជាយូរមកហើយ។

20. "X-Men: Dark Phoenix"

Sophie Turner សម្តែងជា Jean Grey/Dark Phoenix ក្នុង "X-Men: Dark Phoenix"។

តើវានិយាយពីអ្វី?: ប្រព្រឹត្តទៅក្នុងជំនាន់ឆ្នាំ 1990s បន្ទាប់ពីព្រឹត្តិការណ៏នៃ "X-Men: Apocalypse" ខ្សែភាពយន្តថ្មីបំផុតមួយនេះនឹងឃើញ Jean Grey (សម្តែងដោយ Sophie Turner) មិនអាចគ្រប់គ្រង់សមត្ថភាពថាមពលពិសេសរបស់នាងបាន ដែលប្រែក្លាយនាងទៅជា Dark Phoenix។

តើវាមានអ្វីអស្ចារ្យ?: សៀវភៅត្លុក "The Dark Phoenix Saga" ត្រូវបានគេស្គាល់ថាជាសៀវភៅត្លុដែលមានសាច់រឿងដ៏សំខាន់និងមានកេរ្តិ៏ឈ្មោះល្បីល្បាញជាងគេ។ វាត្រូវបានគេណែនាំបន្តិចនៅក្នុងខ្សែភាពយន្ត "X-Men: The Last Stand" កាលពីឆ្នាំ 2006 ដែលទទួលបានប្រតិកម្មមិនសូវល្អ។ ឥឡូវនេះ ផលិតករភាពយន្តទីបំផុតសម្រេចក្តោបសាច់រឿងមួយនេះនៅក្នុងខ្សែភាពយន្តដែលនឹងចេញឆាប់ៗនេះរបស់ពួកគេ។ ជាមួយអ្នកសរសេរសាច់រឿងនិងផលិតករដែលសម្បូរបទពិសោធន៏របស់ "X-Men" គឺ Simon Kinberg ដែលនឹងបង្ហាញសមត្ថភាពដឹកនាំដំបូងរបស់គាត់ ពួកយើងសង្ឃឹមថាពួកគេនឹងអាចរៀបរាប់សាច់រឿងបានល្អលើកនេះ។

21. "Fantastic Beasts: The Crimes Of Grindelwald"

ក្រុមតារាសម្តែងនៃ "Fantastic Beasts: The Crimes Of Grindelwald"។

តើវានិយាយពីអ្វី?: ក្នុងខ្សែភាពយន្តដែលនឹងបន្តទៅនឹងខ្សែភាពយន្តឆ្នាំ 2016 គឺ "Fantastic Beasts And Where To Find Them" អ្នកចេញមន្តអាគមអាក្រក់ Gellert Grindelwald (សម្តែងដោយ Johnny Depp) បានរត់ចេញពីការចាប់ខ្លួន ហើយ Newt Scamander (សម្តែងដោយ Eddie Redmayne) នឹងមានតួនាទីតាមបញ្ឈប់គាត់ដល់ទីបញ្ចប់។

តើវាមានអ្វីអស្ចារ្យ?: David Yates អ្នកដឹកនាំពោរពេញដោយបទពិសោធន៏នៃស៊េរីរឿង "Harry Potter" ដែលបានជួយដឹកនាំខ្សែភាពយន្ត "Fantastic Beasts" ដំបូង នឹងត្រឡប់មកដឹកនាំខ្សែភាពយន្តវគ្គបន្តមួយនេះ។ វានឹងមិនមានភាពពិបាកអ្វីឡើយសម្រាប់គាត់ ដោយគាត់យល់ច្បាស់ពីការដឹកនាំចក្រវាឡ Potterverse។ សំខាន់ជាងនេះទៅទៀត វានឹងជាឱកាសសម្រាប់គាត់ក្នុងការស្តារកិត្តិយសរបស់គាត់ឡើងវិញ បន្ទាប់ពីការបរាជ័យដ៏គួរឲ្យខ្មាស់នៃ "The Legend Of Tarzan"។

22. "Aquaman"

Jason Momoa ត្រឡប់មកវិញជា Arthur Curry/Aquaman នៅក្នុងខ្សែភាពយន្តDC ផ្ទាល់ខ្លួនដំបូងបង្អស់របស់គាត់ គឺ "Aquaman"។

តើវានិយាយពីអ្វី?: ក្នុងការផ្សងព្រេងដំបូងបង្អស់របស់គាត់បន្ទាប់ពីព្រឹត្តិការណ៏នៃ "Justice League", Arthur Curry ឬ Aquaman (សម្តែងដោយ Jason Momoa) ត្រូវទទួលយកតំណែងរបស់គាត់ជាអ្នកគ្រប់គ្រងនៃអាណាចក្រក្រោមទឹកនៃ Atlantis។

តើវាមានអ្វីអស្ចារ្យ?: Jason Momoa បានកញ្ឆក់យកដួងចិត្តទស្សនិកជនជាមួយការសម្តែងរបស់គាត់ជា Aquaman ក្នុងខ្សែភាពយន្តដែលមិនសូវដូចការរំពឹងទុកគឺ "Justice League"។ James Wan ប្រហែលជាជម្រើសមួយដ៏ប្លែកក្នុងការដឹកនាំខ្សែភាពយន្តពឹងផ្អែកលើសៀវភៅត្លុកដំបូងបំផុតរបស់គាត់ ដោយគាត់ធ្លាប់តែមានកេរ្តិ៏ឈ្មោះជាផលិតករខ្សែភាពយន្តភ័យខ្លាច។ ប៉ុន្តែយ៉ាងណាមិញ គាត់បានដឹកនាំខ្សែភាពយន្ត "Fast And Furious 7" ដែលទទួលបានជោគជ័យយ៉ាងអស្ចារ្យ។ ដូចនេះ វានឹងគួរឲ្យចាប់អារម្មណ៏ក្នុងការឃើញគាត់ដឹកនាំខ្សែភាពយន្តវីរបុរស។

Cinema Online, 31 ធ្នូ 2017


ភាពយន្តទាក់ទង:
The Greatest Showman (01 Jan 2018)
Black Panther (15 Feb 2018)
Annihilation (Not Showing)
Red Sparrow (01 Mar 2018)
Pacific Rim Uprising (22 Mar 2018)
The New Mutants (Not Showing)
Avengers: Infinity War (26 Apr 2018)
Solo: A Star Wars Story (24 May 2018)
Deadpool 2 (17 May 2018)
Jurassic World: Fallen Kingdom (07 Jun 2018)
Incredibles 2 (14 Jun 2018)
Ant-Man And The Wasp (05 Jul 2018)
Alita: Battle Angel (21 Feb 2019) [ឃ្លីបអំពីភាពយន្ត]
The Predator (13 Sep 2018)
X-Men: Dark Phoenix (Not Showing)

Jwplayer article page COKH

អ្នកអាចចូលចិត្ត:
To read this article in English, click HERE.

តំណរទាក់ទង:

ពត៌មានថ្មីបំផុត:
ម៉ោងបញ្ចាំង